गगन थापा
विश्वव्यापी रुपमा शेयर बजारलाई अर्थतन्त्रको महत्वपूर्ण सूचकको रुपमा हेर्ने गरिन्छ । शेयर बजारको स्थायित्व र सवलताले लगानीकर्ताको मात्रै होइन समग्र अर्थतन्त्रको समुन्नतिकाे प्रतिनिधित्व गर्छ ।
तर, विगत लामो समयदेखि नेपालको शेयर बजार अस्थिर रहदै आएको छ । २०७८ भदौ २८ गते ३१ सय विन्दू माथि पुगेको नेप्से परिसूचक हिजो १९ सय तल झरेको छ । यस्तो परिघटनाले शेयरबजारको विश्वासनियतामा नकारात्मक प्रभाव पर्ने नै भयो । यो सँगसँगै धेरै साना लगानीकर्ता डुबेका पनि छन् ।
प्रत्येक दिन १५/१० जना व्यक्ति शेयर बजारको बिषयमा गुनासो लिएर आउने गरेका छन । काठमाडौंका मात्रै होइन साना साना शहरका मान्छे पनि आउने गरेका छन ।
दु:ख गरेर दुई पैसा जम्मा गरेर मान्छेहरुले शेयर बजारमा लगानी गरेका छन । कोही झुन्डेर मर्छु भनिरहेका छन् भने कोही सडकमा आइपुग्यौ भनेर हारगुहार गरिरहेको अवस्था छ ।
समान्य अवस्थामा शेयरबजार तल माथि हुन्छ । यो नियमित प्रक्रिया पनि हो । लगानी गर्नेले यो कुरा बुझनु पनि पर्छ । तर, कुनै अस्थिर नीति कारण बजारमा आएको हतासले अहिले विद्यमान र सम्भाव्य सबै लागानीलाई निरुत्साहित गर्छ ।
बजारमा रहेको तरलता अभावले शेयर बजारमा समस्या ल्याउनु स्वभाविक हो । तर, राष्ट्र बैकमा लिइरहेको शेयर कर्जालाई संकुचन गर्ने नीतिको कारण यस्तो अवस्था आयो भनेर आवाज उठिरहेका छन् ।
त्यसैले शेयर बजारको बिषयमा यो संसदमा ध्यान आकृष्ट हुनै पर्छ । म आग्रह गर्न चहान्छु, शेयर बजारको स्थायित्व कायम गर्न र शेयर बजार माथि विश्वास कायम गर्न अर्थमन्त्रालय,नेपाल राष्ट्र बैंक तथा धितोपत्र वोर्ड जस्ता नियामनकारी निकायले के कस्ता काम गरिरहेका छन् सो सम्बन्धमा सदनलाई जानकारी गराउनुपर्छ ।
साना लगानीकर्ताहरुको सुरक्षाको निम्ती के कस्तो काम भइरहेको छ जानकारी गराइयोस् । निजी क्षेत्रको रियल सेक्टर र अन्तराष्ट्रिय लगानीकर्तालाई पनि नेपालको धितोपत्र बजारमा ल्याएर अर्थतन्त्रलाई फराकिलो बनाउनुपर्ने बेलामा धितोपत्र बजारमा यति ठुलो हतासा आउनु सकारात्मक होइन ।
धितोपत्र बजारको नीति दिगो, अर्थतन्त्रलाई सवलीकरण गर्ने खालको होस् । साना लगानीकर्ता भनेको आम मानिसहरु हुन । आम मानिसहरुलाई हिजो हामीले शेयरबजारको जोखिमको बारेमा सुसूचित नगिरिएको कारणले आजको अवस्था आएको हो ।
लगानीकर्ताका लागि यो समयमा यस्तो राहत दिन्छौं भनेर सरकारले नभने कै कारण नेपालको शेयर बजारमा यस्तो नकारात्मक अवस्था आएको हो । यस्तो गम्भीर बिषयमा सरकार पनि जिम्मेवार छ ।
शेयरबजारलाई ठीक ठाउँमा ल्याउनै पर्छ । सहि दिशामा ल्याउनै पर्छ । तर, नीतिकै कारण ४० लाख लगानीकर्ता सडकमा आइपुगेका छन यसको भार हाम्रो अर्थतन्त्रले थैग्न सक्दैन ।
घरघरमा विल्लीबाठ हुँदै गर्दा भोलि गएर यो बिषयले हामीलाई पिरोल्ला कि नपिरोल्ला ? त्यसैले सदनलाई यो बिषयमा जानकारी गराइयोस् ।
(कांग्रेस महामन्त्री गगन थापाले प्रतिनिधि सभामा राखेको बिचार)
